أول حب
حيزية من الصغر سمات عليا
ولما تجي لينا يقول مرت فلان
فيسع كبرت وزيانت صبحت بية
سبحان ملاسها عظيم الشان
خطبوها وداوها مكرة فيا
ونستاهل انا على خاطر جبان
تجينا للبيت مغرومة بيا
ومن خزرتها انا تقول ضربني جان
وليت نهترف قا بها هي
وروح حتى لبيتها والله لوكان
لولا خوف الله وجياحي نايا
لزوجت انا وهي فالعطلان
قداه انفرصة توجدها ليا
امنامة وتفوت نبقى انا عطشان
نسلم على مضربها لوخية
ونشمشم عن ريحها في كل مكان
سحرتني ودات عقلي لبنية
وحنانة من حبها زايد نشيان
مثلتها للشمس كي طلت فيا
ولاحت عني نورها وضوى لمكان
خنفست انايا وغمضت عينيا
حتى راح شعاعها والحال دكان
شبهتها لغزال كي شبت فيا
ودرق عني خيالها ماعاد يبان
اختي نعت قمر ليلة نصفيّة
لؤلؤة حبي في وسط النسوان
اول حب انا ليا حيزية
وماننساش انا غزالي مهما كان
نسبح فالليل باسمها هي
ونفسع من النوم حفيان وعريان
مالقيتش كيفاه نقلبها ليا
نتنهد ونقول والله يالوكان
لما نذكرها يفيضو عينيا
ونعشي مريض دهشان وتعبان
لميمة كي تشوفني تفرح بيا
وتبذل مجهودها بالشي لي كان
نحشم انايا ونحط عينيا
وتذهبلي حتى الهدرة يالخوان
اسمها هي مكتوب عليا
سجلوه جنود في جيش الرحمن
لكن القدر تنكّر ليا
وبالذمة باه تكثرلي لحزان
نبني ونهدم في غيابها هي
ولما نقابلها يختل الميزان
ياسبحان الله اسمها ثاني حيزية
حتى انايا ساعد يالخوان
بنت الخالة حبها سكن جواجيا
ومثل مثل الدم لعروق الانسان
مرضنا لثنين انا وهي
والطبة قالو داءكم نفسان
فرقو المحبين يعطيهم كية
يكافيهم ربي هذوك العديان
خالتي لعزيزة درتوها فيا
مديتوها لي وداها فلان
لوكان جيت كي ضرك تحزن عليا
ولا داوها يدوني انا ثان
لكن كنت صغير لاقدرة ليا
ولما فات الحال هذاك لي كان
نستسمح من زوجها وحتى هي
ولي قلت انا تعبير الوجدان
يسالني بالله لا خنتو نايا
ونحلف حتى عليها هي ثان
لابد من المماة وفراق الدنيا
ونتلاقو فالدايمة عند الرحمن
ترجع حبيبتي انايا ليا
نتنعم انا واياها فالجنان
الفرجاوي الفرجاوي الجلفة الجزائر 🇩🇿
