قصيدة & مجمع لحباب & بقلم الشاعر : أحمد الكرش

قصيدة: مجمع لحباب

بقلم : احمد الكرش

فين مجمع لحباب وفين حديثهم

فرقهم الزمان وخواو بيوتهم

العش للي كان مدفيهم ويجمعهم

داه الريح ومن اللمة حرمهم

اه عليك اليام

جمعتينا وعيشتينا في لوهام

وفرقتينا وضحكتي فينا لفام

بعد ما دازت سنين واعوام

خليتي عيني تبكي على الدوام

تبكي وتنوح وتقول هذا حرام

حرام يتفرق الخو على خوه

وحرام يتفرق الولد على بوه

والحنان للي بيناتهم يدفنوه

يغطوه بالتراب وما يزوروه

فين الصينية للي تجمع لحباب

تفرقو كيسانها وبرادها غاب

فين حديت لخوت وفين التقشاب

وفين البركة لحلوة وتقرقيب الناب

كلشي تفرق عشنا لعذاب

توحشنا المجمع توحشنا دقة الباب

تفرقات اللمة هذا مكتاب

هذا نصيب للي تفرقو حبابو

بعد ما زغبات راسو شابو

صبح وحداني عينيه بالدموع طابو

يبكي على لفراق وعذابو

نتمنى يتجمع الشمل

في بيت واحد ومنهم ما نمل

مع لحباب والفرحة تكمل

نديرو ليد في ليد يخفاف لحمل

وتعمر الدار بالمحبة بحال قبل

وترجع البسمة ويرجع لعقل

هما حبابي هما لغطا هما الظل

هذاهو الزمان كيف العادة غدار

مرة يفرحك ومرة يعيشك في لمرار

هو للي يجمعنا ولا يفرقنا كلو أسرار

هذي هي سنة الحياة وخا قلبي شاعل نار

كل واحد شد طريق الشوك ولا النوار

هذا قدرنا وهذي حكمة الجبار

بقلم : احمد الكرش