قبل الوداع
روح يا قلبى روح و سلم ع الحبايب
روح وودع النهارده انت معاهم
بس بكره هتبقى غايب
روح وودع الاماكن
روح وسلم ع الشوارع والبيوت
سلم على دمع الخدود
سلم على برد الشتا
دور على حضن الدفا
على نجوم متلهفه
تلمح نهار
سلم على موجه فى بحر الانتظار
سلم على ورده تعبت م المرار
عاوزه تفتح ع الخضار
عاوزه تفرح
عاوزه تودع
الصحارى للعمار
روح واسمع زقزقة عصفور سعيد
لما يلمح فجر طالع من بعيد
جاى يفرح التقى عمره الجديد
روح وسلم ع الشبابيك الحزينه
ع السلالم
ع البيبان
على الصحاب بتوع زمان
ع اللى كان قبل اللى كان
ع المحبه والحنان
على كل شئ مر ومضى
على كل هايم ف الفضا
على كل قطرات الندا
يلا ودع القلب اللى حبك
روح وقوله انك مسافر
بس بردو هتبقى فاكر
كل شئ عديت عليه
وقت الوداع
بقلم / محمد بيه محمود
ليست هناك تعليقات:
إرسال تعليق