-بعلة الحرمان-
*****
فكرت ازرع وردتي ببستان
واترك عبيري بحضنها غافي
وانشر رموشي شراشف وخيطان
عرزال يغفى تحت صفصافي
بلكي الحلو هاالقاعد ونعسان
يغفى شي ساعة بالهنا الصافي
وصفصف نجوم بجوقة الألحان
واترك حروف الشوق عشفافي
كرمال ولفي الأهيف وفتان
لعبر صخور جبال وحفافي
وزركش تيابو بريشة الفنان
ووصل لوجه البدر إرهافي
ألفيت حالي بحانة الندمان
شارب كؤوس الصبر عا الصافي
معقول عشت بغابة النسيان
اسمي :الألم وهموم أوصافي
معجون قلبي بعلة الحرمان
حامل هموم الكون ع كتافي
آدم أنا كيف صادني الشيطان
بتفاح حوا نسيت تعفافي
من عهد شيث وعاد وسليمان
ذاكر عهودي إلك لا تخافي
وناطر ليالي بصورتك سهيان
سكران جنبي الليل ولحافي
ناطر حلم رح يخرق الحيطان
تتنام عيني بأمل وعوافي
أو صوت منك ينده بتحنان
ودربك جمر تمشيه عا الحافي
بقلمي.
محسن محمد فندي
M.M.F
********
ليست هناك تعليقات:
إرسال تعليق