أم الإيدين حنينين
.......................
ياأم الإيدين متحنيين
بالرزق الحلال
ياللي صبرك هد
الجبال
ياللي طبة عجينك
تشق صمت الليل
في وقت السحر
ومع شقشقة الفجر
بيكون عجينك خمر
وانتي ياامه
ف وسط الدار
والله زي القمر
وتحمي فرنك بالحطب
وتقولى لاختي
داللي زيك إتخطب
وتعلميها تخبز وتسطح
والعجين ف الطشت
يفرح
والعيش يغني
بين إيديكي
والفرحة طلة
من عنيكي
وتجمعينا ف طرف شالك
بردانين
و أبويا يسأل فين عيالك
تخرجينا من طرف شالك
دفيانين
ياام الإيدين حنينين
.........................
بقلم /محمد صادق ندا
ليست هناك تعليقات:
إرسال تعليق