♣️♣️♣️♣️♣️ هُس هُس ♣️♣️♣️♣️♣️
هُس هُس ياحيطة . بس . متقوليش
خلي صوت الدمعة واطي . متناديش
مهما دُوقت الجوع يابطني . متصرخيش
كله شافني . واللي شافني . قال مافيش
دي الحكاية . طريق طويل . ما بينتهيش
هس هس يا حيطة . بس . ماتقوليش
خلي كل كلامنا سر . متنسينيش
لو هقولك ع الفرح . كله كدب . متصدقيش
لو حكيتلك ع الفزع . كله عادي . متخافيش
دي الغلابة . ودنيا غابة . صورة مرسومة ف أفيش
هس هس يا حيطة . بس . متقوليش
جيت لنفسي . يلا قولي . متكتميش
علي صوتك بالكتابة . متذهقيش
فكريهم بالغلابة . ومهما قولتي . متكدبيش
نادي ع الدمعة وقوليلها . متنشفيش
خلي شعرك كله معنى . واحكي عن كل الصور . ولا تسكتيش
مهما نكتب ع الغلابة الكتاب مبيتمليش
♣️♣️♣️♣️♣️♣️♣️♣️♣️♣️♣️♣️
شادوليات
شاذلي محمد عبدالرحمن حسين
ليست هناك تعليقات:
إرسال تعليق