توت توت
توت توت جانا الحاوى بالنابوت
مسك البيضه قال فى البيضه
كام كتكوت ؟
ناس فى بلدنا مش فاهمين
قالوا الحاوى شخص عظيم
مسك الحاوى النابوت
مات ألفين وتلاته كتكوت
خاف الناس لاموا ولادهم
خشوا بيوتهم
ما فى الشارع ولا كتكوت
فهموا الدرس ولاد الإيه
رجع الحاوى باشا وبيه
بس الحاوى مش مبسوط
خايف بكره الكتاكيت تكبر
تبقى ديوك
تدن تاني فى الميدان
لازم الحاوى يمشى الأن
قام الحاوى من ألاعيبه
حط شوية رز فى إيده
طلعت كتاكيت المساكين
مسك الحاوى السكين
دبح الحاوى ألف أتنين
خطف الحاوى باقى الكتاكيت
حبه فى سجن وحبه عبيد
طلع الحاوى بلعبه جديده
قال يا غلابه هما ديابه
خطفوا ولادكم
أنا ح أحكمكم
بس إدوني الإذن أبدهم
ناس فى بلدنا مش فاهمين
طلعوا يقولوا للحاوى أمين
قعد الحاوى على كرسيه
قال لجنوده كده فاهمين
كل اللى ح يقتل كتاكيت
مش ح نحاسبه على المشاريب
لكن ربك رب كريم
ناصر المظلوم على الظالمين
أرسل جند صغير من أجناده
كل العالم بقوا خايفين
هيه رساله لكل الظلمه
بس يارتهم أه فاهمين
بص العالم شوف الدنيا
كل شوارعها فاضين
كل الظلمه دخلوا بيوتهم
كل جنودهم كل سلاحهم مش قادرين
جند صغير من أجناده
بعته رساله للظالمين
بس ياريت هما فاهمين ؟
شعر
على أبو السعود
ليست هناك تعليقات:
إرسال تعليق