حدوته (من شعر العامية المصرية )
===================
كان فيه بنت وواد فى جنينه
متواعدين ع الحب الصافى
هب الشتا وف ليله حزينه
سرق النور م القلب الدافى
لمحت عينه عيونها وهيه
شافت كل الدنيا الجايه
دنيا جديده ومابين ثانيه
سمعوا الحب بينده ندهه
غنى القلب وغنوا معاه
وإتوعدوا على شط هواه
قبل الخوف ما يعدى علينا
بين أمواج البحر الهاديه
ورماله ونسايمه الناديه
ضمينا الشمس المتهاديه
حبينا وحلمنا ببكره
فرحه وضحكه وحب كبير
هب الشتا شايل أعاصير
وخطف من قلبى الياسمينا
ومشينا يا قلبى لوحدينا
والدمعه اللى مابينا حزينه
خطويتها بتنده خطوينا
لهفتها وشوقها المدارى
وكسوفها عمرى ماهنساه
فرحة قلبى خدتها الآه
والذكرى بتيجى تصحينا
كان فيه بنت وواد فى جنينه
متواعدين ع الحب الصافى
هب الشتا وف ليله حزينه
سرق النور م القلب الدافى
******************
أشعار/ ايمن الشهابى
مصر
من ديوان أغانى الحب والالم
ليست هناك تعليقات:
إرسال تعليق