وصفوني بإني حبيبك
بس دي كلمة شوية عليكي .
أنا مجنونك ،
كاتب شِعري بلون أغانيكي .
أنا مفتونك
سايب شوقي يكحّل رمش عنيكي .
أنا مشتاقلك ..
زي الورد ما سلِّم ساعة القرب
عليكي .
أبعد عنك !!
لا ولا لحظة تفوتني
مشوفشي الشمس تنوَّر ليكي .
أبعد عنك !!
لا والله ، ده نِفسي أصَبَّـر قلبي
بكلمة تخلّيكي .
تختاري شموعي تنوَّر ليلك ،
تملَا الدنيا عليكي .
أبعد عنك !
والله ما لحظة تعدِّي عليَّا
إلا وشِعري يمام حواليكي .
لمَّا يغنّي يقوللك :
أنا هربان من حبك ليكي .
لمّا يغنّي يقوللك ،
زي ما كان بيقوللك : مِدِّي إديكي .
وصفوني بإني حبيبك
بس الكلمة شوية عليكي .
يا اللي فَتنتِي الروح والقلب بنظرة
ويا اللي شَرحتي الشوق والعِشق
بضحكة ،
أنا عايش بيكي .
قولي لحُسنك يهدا عليّا
لحد ما أحاول أوصف بس عنيكي .
لحد ما تبقه قصايد شعري
ورود على كفك
نسمة ترفرف حواليكي .
قولي لكل الدنيا عشقتك
نِفسي أشوفك ، نِفسي أضمّك
قبل ما تبعد خطاويكي .
ما أنا مجنونك
كاتب شعري بلون غناويكي
وأنا مفتونك
سايب شوقي
يكحَّل رمش عنيكي .
بس هتفتكريني أكيد
ورسايلي شموع بتنوّر لياليكي .
ولمّا تكوني ف يوم بردانة
مفيش غير حضني يدفِّيكي .
بس إنتي إفتكري إن ( بحبك )
كلمة شوية عليكي
بقلم الشاعر السيد العبد
ليست هناك تعليقات:
إرسال تعليق