ناكرين جميلها
بقلم سامي محفوظ حنا
ليه ناكرين جميلها
وبتتكلموا كتير عنها
وتشوهوا دايما صورتها
ما تستهلوش
تكونوا أولادها
لو ماستحملتوهاش
في ازمتها
أزمة نسيرها تمر
بندوق فيها أيام مر
بعدها سنين فرح تسر
بلاش نفكر نسيبها
نقف في ظهرها
ونسندها
لحد ما تعدي أزمتها
ترجع تنور وتجلجل
ضحكتها
حزين يا اللي
فكرت تسيبها
بكره تشتاق عينك
تتكحل بترابها
وتعطش ومين يرويك
غير نيلها
دي مصر أم الدنيا
عمرها ما منعت
عن حد خيرها
حقها علينا
نحميها ونصونها
مهما عملنا
مش راح نقدر
نرد جميلها
بقلم سامي محفوظ حنا
26/12/2022
ليست هناك تعليقات:
إرسال تعليق