أنا راضي.....
أنا مصري من ساسي لراسي
وعمري ما أقول غير إحساسي
بس الموج عِلي عليّا
و غرقت فيه أنا و ناسي
شربت المُر و أنا راضي
و قلت الصبر هيداوي
أتاري الصبر مِدَّاري
واخد على خاطره من حالي
كتبت حروف مصدية
عملت منهم أغنية
أَصبَّر صَبري على حالي
و أداري همومي بسخرية
حتى الفول و الطعمية
يا ناس غليوا عليا
تعبت قلت مش لازم
أصل دواهم خسارة فيا
محتاج أنا حبة حنية
و أنسى طلبات المخفية
أصلها ندابة و نكدية
محتاجة في الشهر كذا مهية
و الحسبة معاها معدية
معذورة دي كانت متهنية
و أنا مين يقدرني و يعذرني
و يحميني من كسرة نفسي
و عيالي مين يعذرهم
على العيشة دي و يفهمهم
عايزين أكل و تعليم
و هدوم صيفية و شتوية
دا غير الطلبات و الاحتياجات
يا ناس حد يرد عليا
ندخل عل الميديا و أحوالها
اللقطة أهم من اللقمة
و ناس راحة و ناس جاية
و تشوف على الميديا
حاجة غريبة
بلادنا فيها صورتها عجيبة
الكورة و فريقنا القومي
أهم من مستشفانا يا فقري
و لا التعليم تلاقيه تهييس
من غير تأسيس
و نقول تطوير
دا في التصوير
حاجة جميلة مية المية .....
تهاني بركات ٢٥ / ١٢ / ٢٠٢٢
ليست هناك تعليقات:
إرسال تعليق