فراق الشيخ
*********
كي نوقف فالباب نتفكر شيخي
المصباح لي كان ذا الحي مضويه
بعدو يالحباب نا ضاقت روحي
واه القعدة ثان راها سماطت فيه
طالبنا كي كان مونسنا شيخي
عامر بيه البر القاشي مايخطيه
راح لدار الحق ويحي ياويحي
حتى بالمعروف راح مع مواليه
لا قهوة لا تاي لا شيخ ويفتي
نصنت ندي فوايد ونسقسيه
معلمنا كان عالمنكر ينهي
حتى بالسكران كي يشوفو يخطيه
من شارعنا راحت روايح بكري
وغزانا ناموس يلسع بيباريه
نتاسف لرحولكم سيدي سيدي
مانلقى محال مثلك يافقيه
وتتحسر حتى عجايزنا تبكي
فراق الشيخ صعيب ماطقناش عليه
محسن للجيران زاهد وتقي
فان الدنيا مايحبو مايشتيه
للثورة اسرار في صدرو يخفي
سرو راح معاه ربي يعلم بيه
غير عليك اشيخ يلزمنا نبكي
وندون تاريخكم للنشا ونهديه
وين يروح قاصد وكركم كي يجي
من يستقبل ضيفكم يتهلى فيه
لكن اجلك جاء ماينفع شيء
ندعي بالرحمة لشيخي ومواليه
ناظم ذا الابيات ساعد لطرشي
جاور هذا الشيخ وقت وعز عليه
نختم بالصلاة على حبيبك ربي
محمد امامنا وعلى آله
ساعد لطرشي الجزائر 🇩🇿
ليست هناك تعليقات:
إرسال تعليق