قصيدة / قالوا انى شبهك
......
قالوا اني شبهك...
و اني واخد كل شئ منك...
و انا قلت لأ...
مش سهل ابداً اني اكون زيك...
اصل الشبه مش بس شكل...
الشبه في الروح اهم...
و صعب طبعاً...
ان حد يكون فى شبهه زي ام...
لو كنت شبهك يضربوا بيا المثل...
ده عشان احاول ابقى زيك...
قلبي لازم يتغسل...
صحيح انا اتعلمت منك...
في الحياه ياما حاجات...
خدت منك القناعة و الرضا...
قلتيلى يابني اوعي يوم...
تبكي ابدا ع اللي فات...
و اوعاك تعيد في اللي مضى...
قلتيلى مهما كان نصيبك في الحياه...
ارضى تملي بالقضا....
حبيت في وشك بسمتك...
عجبتني فأتعلمتها...
و بقيت بقابل اي حد ببسمتي...
و عرفت منك ان حبي للجميع..
هو دليلي في سكتي...
و لاحظت فيكي في الظروف...
امتي بتحتاجي الكلام...
و امتى لازم تسكتي...
حبيت لسانك اللي بينقط في شهد..
و ازاي عرفتي تكسبي...
بجمال كلامك اي حد....
انا فعلاً اتعلمت منك امشي صح...
و ان الحلال بيّن ماهوش محتاج لشرح...
و ان يوم ما ازرع جناين خير...
لابد منها الاقي طرح...
و ان اكبر كنز موجود في الحياه...
اسمه حب...
كنتي لينا مش مجرد ام بس...
كنتي اب...
خدتي الدورين...
من و احنا لسة صغيرين...
و نسيتي نفسك..
و برغم مفرمة الظروف...
مفيش في مرة شفت يأسك...
تسوي ايه الدنيا دي....
من غير ما يبقى فيها حسك...
صحيح انا اتعلمت منك خير كتير...
لكني برضه مستحيل...
اني ابقى زيك...
محتاج يادوب كام عمر تاني....
بعد عمري جنب منك...
و أفضل اتعلم صفاتك...
ياللي علشانا وهبتي العمر كله....
سامحينا على كل اللي فاتك...
خدي اللي باقي في عمري ليكي...
و يبقى لسة ليكي عندي....
كل اللي عدي من حياتك...
بقلمي : علي نافع
ليست هناك تعليقات:
إرسال تعليق