كلماتى بفضل الله
الشاعره فاطمه محمود صالح
مره قابلنى عجوز في الشارع
شوفته بيضحك جالى زهول
قولتله ايه فى الدنيا يضحك
أنا مخنوق وحزين على طول
قرب منى وقاللى احكيلى
مالك كده مكسور وحزين
قولتله اللى اداك يدينى
قوللى أجيب الفرح منين
انا زعلان جدا من حالى
مش لاقى شغل ولا فلوس
مش عارف ايه اللي جرالى
المنحوس دايما منحوس
الرجل الطيب اتبسم
قاللى بسيطة بإذن الله
عايشين هنا علشان نتعلم
هتروق وتعيش احلى حياة
اضحك للأيام تضحكلك
وانسى همومك وانسى مشاكلك
لو تجرى ورا الدنيا تسيبك
لو تديها ضهرك تندهلك
لو عايز تفرح هتلاقى
الفرحة في كل زمان ومكان
لو عايز تحزن هتلاقى
عمرك كله بقى احزان
ادعى وربك هيعدلها
ويخليها عال العال
من حالة لحالة يبدلها
ربك وحده عالم بالحال
هى تمللى الدنيا عجيبة
فيها الحلو وفيها المر
ساعة عدوة وساعة حبيبة
لازم كله يفوت ويمر
لازم تتعب فيها وتشقى
علشان تعرف طعم الفرحة
اوقات قاسية واوقات تبقى
زى عروسة جميلة بطرحة
فى الآخر هنموت ونسيبها
حدش واخد حاجه معاه
عيش أيامك وانت حاببها
مش دايم غير وجه الله
ليست هناك تعليقات:
إرسال تعليق