♕ الحاكم بأمره ♕ بقلم الشاعر : جمعه الجر

 ..الحاكم بأمره..

حضرت جناب الديكتاتور..

والحاكم بأمره..

كرباج جنابك علم فى القلوب..

نستسمحك ياريت كفايه كده..

دااحنا يادوب لسانا بنفوق من ضربتك...

لسه بنعلم خطانا..

ازاى تتوه عن سكتك...

يمين الله ياما اسينا كتير من قسوتك...

مش مصدق..

هو انت مين يصدقك..

غلطة قلوبنا إن إحنا كنا بنعشقك...

وغمضنا عينا عن الخيانه..

وقولنا يمكن نغيرك..

صحينا لقينا جرح وبينزف من طعنتك...

يادمعتك اللى خدعت قلوبنا وخدتها يوم لمحبتك...

مش ذنبنا إن الطيبه فينا مأصله ومتفصله على ادنا..

دى نعمه غاليه من ربنا..

سبحانه زرع الود جوانا للناس كلها..

مش ليك لوحدك..

ولا إحنا تحت رحمتك...

نهاية الكلام..

لو لسه عندك ذره من ضمير..

أو لاقى جوا منك أى خير..

ابعد لسانك عننا..

بلاش تجيب سيرتنا كل يوم وتسبنا..

مش ده جزاء محبتنا ليك وصبرنا..

على الخيانه والمهانه لودنا..

ادينا فرصه يمكن ننسى يوم عملتك...

         جمعه الجر