أبوذيّات و دارميّات للخوّان
يخي ربّك إبكل حادث عليمن
تحش و إتحزّم إبزودك عليمن
تعيل او فوگ عيلاتك علیمن
نسيت إحساب ربّك و المنيّة
***
أنت الهنتني إبيوم أحلف چنت بيك
تبعد علي مجبور إمن إبعيد أواسيك
إتجاوب سلامي أرجوك إبدربي إمن الاگيك
***
الإخو مفگود للناحَت بالفراگ
تبدل الخايب او جاهل بالفراگ
البيه هيبة بنه أسلافه بالفراگ
إبجبل و إبهور و إبشاطي الخويّة
***
گمرا او ربيع الدار و الضحكة تذكار
لو خوتك إتشب نار و إتخبّر الجار
إتخدّر الگهوة او چاي شرب الفرح حار
***
حلاة الخوّة وكت الضيج عدهه
او عيله الّي شفاهه الصبر عدهه
تتمنّه اليتيمة أخوان عدهه
ينشفون الدمع بإلموزميّة
***
إبن إمّي تاج الرأس روحي و أملهه
ما أبيعه لو محتاج بإلدّنيا كلهه
ناس الذّي إتعاديه ما إصفج الهه
زهدتّه ربعه الچان شايل حملهه
***
صعب ضرب النواصي إبفگد خيّاك
او عيد إيصير لو من سفر خيّاك
الإخو لو خان أخس من رمح خيّاك
يجرحك و الخلگ ضدّك ربيّة
***
فدوة الگلب و الروح و إنشد عليّه
إخوي أنت و أتفدّاك حد المنيّة
ما أعيش أنا إبليّاك بأخر وصيّة
فارگتك او تعبيت و البيّه بيّه
***
الگلب شب نار و أنهل منسه بيته
إشلفاك إبذل حرگته منسه بيته
أفتخر عندك لگيته منسه بيته
الحمد لله إبأمان إيكون اليّه
***
إبشرجي او ذكرتك يوم و أنت إعلي بالي
يا ريتك أنت إحذاي و إتشوفه حالي
إمدلل إبّين أجناب إمضيّع لي غالي
أجر بإلدمع بإلليل محّد شچالي
***
شجر خضّر دليلي او شاك منساك
إبغيابك ذهب للعاداك منساك
إبعدت عن الذّي يهواك منساك
إعتنيتك لا تسد بابك عليّه
***
طير او طرت لبعيد يبن إمّي معذور
تابعتك او فرّيت و إجناحي مكسور
يا ما بحثت إعليك و إگليبي مطرور
گالولي تحت الگاع تلگاه بإلگبور
***
الحنان او شوگي بعيوني بيا دار
نزف دمعي أبحث الشوفك بيادار
عزيز او نار هجرانك بيادار
تشب بچلاي و إفّادي و إديّه
***
يا ما سهرنه الليل و إيدك بديّه
و أبعث رسايل شوگ و إترد عليّه
إتغيّرت من كبريت عفت الثنيّة
إمودّع الله إوياك روحك جويّة
***
إدك و انظم شعر لجلك بيارأي
و أگولن هلبت إنثمّر بيارأي
أمحلن وأسگي إبزرع ذوقك بياراي
طفح زرعك بحر عودك خويّة
***
ردتك عصى للشيب توگف لما أموت
و أنتچي بإلصعبات إتباريني بسكوت
چا وينك أترجّاك يا سامع الصوت
يا وسفة خنت إوياي و إبروحي منحوت
***
جاسم ثعلبي الحسّاني (جاسم محمّد الحسّاني)
22/11/1402
ليست هناك تعليقات:
إرسال تعليق