♕ ذكريات ♕ بقلم الشاعر : نصر سيد بدر

 ذكريات

أقول لمين؟؟..واعيد لمين؟؟

وتصدقوا من غير يمين ..

مافضلش م العمر اللي فات

غير ذكريات ...

معظمها حبة ضحك...

علي حبة اهات ...

وسنين وضاعت من سكات

واللي بنصبح فيه..

بنرجع فيه نبات ..

علي قلب مات..علي عمر فات

علي دنيا بتدور دوامات ..

وفي بحرها عرفنا الغرق

عمر اتسرق..قلب اتحرق..

علي ناس وكانوا قريبين..

راحوا ..

وراحت بعدهم عشرة سنين

ضيعنا عمرنا في الندم..

حتي الندم..جبل اتهدم..

والعمر فات زى العدم

هو اللي فات يرجع لنا ؟؟

ونشوف قلوب حنينه..

يرجع لنا..طعم السعاده والهنا..؟؟

واللا اللي ضاع ..راح مننا..

هل مستحيل النبض يرجع قلبنا؟؟

ياربنا..ياربنا .. ياربنا..

اجبر بلطفك كسرنا..

والذكريات ترجع لنا..

ونعيشها مع ناس طيبين..

يستاهلوا روحنا وعمرنا.

.......... .........

شعر/نصر سيد بدر..القاهره