♕ أستاذ ♕ بقلم الشاعرة : أحلام شحاته أبو يونس

 أستاذ

يا حبيبي أنا ف مدرستك

لسّه يادوب تلميذه باتعلّم

إزاي أكتب أوّل حرف ..

و إزاي يكون ف عنيك الوصف

و برغم الوقت المتأخّر ..

قعدت ف أوّل صفّ

كرّاسة حبّي سطورها بريئه

تستنّى المدد الجاي من حبر القلب

و بكل ما أملك من أحلام

شخبطّت على الأوراق بإسمك ..

و رسمت ملامحك ..

قمر .. ف سمايا و نجم بعيد

رسمت ورود و نخيل

سحاب .. و بحر عريق ..

رسمت براح .. و قعدت أرتاح

و لسّه هابدأ أفهم أوّل درس ..

الجرس ضرب

أحلام شحاتة أبويونس