أم الضفاير
البنت ام الضفاير
لها قلب ياناس كبير
بتبص ورا الستاير
شافت فستان حرير
نزلت تشوفه بكام
لاقته بفلوس كتير
ياعينى يا ام الضفاير
البنت كانت فقيرة
أبوها كان الغفير
قالت يارب ارزقنا
كما رزقت الطير
البنت زعلت ونامت
تعبت من التفكير
ياعينى يا ام الضفاير
فى الحلم كانت أميرة
وأبوها كان الأمير
البنت كانت في حيرة
طلبها ابن الوزير
حبيبها كان الجناينى
ما حيلته حتى السرير
ياعينى يا ام الضفاير
عرف الأب حكايتها
وكان حسابه عسير
مسك الكرباج وقال
اسمعى قرارى الأخير
أنا جبت العيش والفول
قومى اغسلى الجرجير
أتارى أبوها صحاها
من حلم كان المصير
ياعينى يا ام الضفاير
بقلمى
سعيد مراد
ليست هناك تعليقات:
إرسال تعليق