قصيدة & هارد لك & بقلم الشاعر : مصطفى فتحي السعيد

 هارد لك

سيبك بقي من الحب ياصاحبي ووجع القلـــوب

ومتزعلش نفسك اوي  دا كل شي مكتـــــــوب

اديك جربت الحب يافالح وانكويت  بنـــــــــاره

كنت فاكر نفسك روميو ولا انت عايــش جاره

اوقات تكون مبسوط والفرحه مش سيعــــــاك

وهي هي نفس الخيبه قدامــــك وماشيه وراك

ياسلام علي الوجع ياصاحبي لما يكون شمتان

بياخد بطاره منك ياحزين وانته مش دريــــان

عمال بتبكي بحرقه وعارف انها مش ليــــــك

طب خدت ايه من البكا  لما راحت عنيــــــــك

اسمع كلامي ولو مره وجرب المسيــــــــــــار

لاحب ولا قلبة دماغ هو  يادوب مشـــــــــوار

الحياه قدامك ياخايب وفيها بنات حلويــــــــن

او اصبر لما تموت وتجيلك حورية عيــــــــن

هما يعني اللي حبو واتجوز عايشين متهنيــن

يادوب شهرعسل وسنين بصل وعيشه طيـن

انا ياما حذرتك وقلت ياويله الي منها يقـــرب

مسمعتش كلامي ومشيت يلا بقــــي اشــــرب

عارفك هتقول الحب في القلب مليش دخل فيه

هقولك الحب خان صحابه واخرتها اخــدو ايه

اصلك دماغك ناشفه بس قلبك حنون وضعيف

لما تقولك كلمه غرام بتتحولك لشخص كفيف

حاول تنسي الحزن شويه الدنيا مش ديمـالك

هي حكايه مشاعر ولا انته مش واخد بــالك

طب قوم غير هدومك واتمشــي علي رجليك

واقفل ودانك واوعي تبص كتير حــــــواليك

علشان متسمعش كلمه تصحي فيك احساس

اوحتي تشوف صورتها علي وجـــوه الناس

ودور في الشارع  علي اقرب قهوه بلـــــدي

اقعد عليها واطلب شيشه وكبايه تمـر هندي

هتلمح بعينك راجل عجوز وشه بشــــــوش

اقعد معاه ولاعبه طاوله وادفع متحاسبوش

وخد بالك من زهرك يزنقك في خانة اليـَــك

ساعتها هيفهم حكايتك ويقــــولك هارد لك

بقلمي/ مصطفي فتحي السعيد