رجل مغربي & منجج البوح & بقلم الشاعر : محمد حديش

{زجل مغربي}

مَنْجَجْ البوحْ

~~~~~~~

ڭَلْتْلِيا ياحَرْفي كْتَبْني

رْسومْ مَنْجَجْ الْبوحْ

وَعْصَرْ دَمْ حالْ ضَرِّي 

بْلا تَنْهيدا فْ الجُّوفْ

تَشْرَبْني مْجاجْ حَرْتي

جَغْماتْ ضْبابْ مَعْصورْ

تْنَوَّحْني حْزانْ دْواخْلي

طَالْعا تْنينْ مَنْ ضْلوعْ

تْڭَمَّطْني صْبَرْ رْزانْتي

ساتْرا مَنْ قْوامْ الشُّورْ

وَتْوَنَّسْني فْراحْ صَغْري

ضَحْكاتْ صْفا الرُّوحْ

بُوحَكْ غْرامْ سْكَنِّي

وَحْشاتْ كْلامْ مَنْقوشْ 

مْوَنَّسْني فَ زْمانْ بَرَّاني

مْكَتَّفْ بَلْتامْ مَڭْروحْ 

مْشارْكْني وْجَعْ دْماغي

هَوَسْ سودَنْ صْروفْ

مْسَرَّجْني بَلْجامْ بْكَمْتي

مْزَيَّرْ صْريمَتْ الْڭولْ

شَلاَّ تْعاويدْ واشَمْني 

حَر الْمَجْمَرْ الْمَزْهورْ

بْسَفُّودْ الوَقْتْ الْكاوْياني

فْ زاوْيَةْ جَّدْبا مَرْبوطْ

يَتْحَيًّرْ القْلَمْ فَ دْوايْتي

يْنَجْ صوفْتْ لَبْغو عْطورْ

شَحْما تَشْواتْ فْ ضَهْري

فْدَڭْها مْعَصَّرْني عْطوفْ

خاطَبْ لَمْتَلْفا شيبْتي

مْخَضْباني بْحَنْتْها مَعْشوقْ

مَلْكاتو بَمَسْرارْها لْساني 

ؤُفْكَفْ زينْهَا حَرْفي مَبْهورْ

مَنْ سْوالَفْ الكْلامْ مْدَوْباني

عاشَقْ حْروفْ الزِّينْ مَغْرومْ

شَلاَّ زْرابي الْحالْ مْدَوْباني

شادْ ميزانْ الحْروفْ مَسْكونْ

يا حَرْفي جولْ البْحورْ راكبين

مَنْ حَطَّا لَفْرارا مْصَفْيا سْطورْ

غوصْها دِييْ جْدودْ نْطَقْها لْسَاني 

بقلم محمد حديش

م͠ج͠د͠و͠ب͠ آ͠ل͠ح͠رف͠

27\07\2020