& زجل مغربي .. جَدَّا & بقلم الشاعر ؛ محمد حديش

 قصيدة زجلية مغربية عن الجدة

♧زجل♧

جَدَّا

~~~

جَدَّا ياجَدَّا بْحَرْ الحَنانْ

مَنَّكْ تْفَرَّعْ غْصانْ الأَصْلْ

شَجْرا تامْرا بْحَكْمَتْ زْمانْ

سَكَّةْ الصْفا مْعَطْرا مَسْكْ

جَدَّا ياجَدَّا الْعينْ ما شافْتَكْ

خْبارَكْ مَنْ الْوالْدينْ تْسَمْعاتْ

مْرابْطِيا كَرَمْ ؤُجودْ شَلًّالْ

فَلَّاحا ؤُتْنَجْ زْرابي تازْناخْتْ 

جَدَّا يا جَدَّا ڭَلْبي بَهْوْنَكْ

مَنْ الوالْدينْ رْويتْ غَوْصَكْ

ؤُحْداڭْتَكْ مْرا بْعَشْرْ رْجالْ

جْدورْ الشَّرْفا غَرْسْ مْأَصَّلْ

جَدَّا يا جَدَّا تْشَوَّقْتْ لَزْمانَكْ

خْيوراتْ فَيَّاضا بْنِيَّةْ القْدامْ

قَسَّمْتِ سْخا كْبَدْتَكْ طْرافْ   

عًجْناتْها خْميرْتَكْ تْرَيْيا جْبالْ

  

 جَدَّا يا جَدَّا الوْجَهْ المَبْشورْ

الصْبَرْ لَبْساتو مْحَزْما بَالوْقَرْ

تْرَبِّي مْسَدْيا مَنْجَجْ الخْواطَرْ

عْقَلْ مْفَطَّنْ بْغَرْسْ الْحُرَّاتْ

جَدَّا يا جَدَّا خَيَّالا تْبورَدْ

سْرَبْتْها دَوَّاتْ مَحْرًكْ العَزْ

غْبارْ تْرابَك سَرَّجْ الفُرْسانْ

الله يَرْحَمْ القْبَرْ ؤماخَلَّا

جَدَّا يا جَدَّا أَرْضْ الأَخْيارْ

 مَنّكْ رْضَعْتْ جَدْبَةْ الْحالْ 

لْبَسْتْها سَلْهامْ مَنْ الوالْدينْ

الله يَرْحَمْهُمْ وَيْنَوَّرْ وَجْهَكْْ 

 جَدَّا يا جَدَّا مَزِّينْها صُورْتَكْ

رْسَمْتْها حْروفْ مَنْ نْوارَكْ

مْزَمْما مَنْ رْضاكْ رْسومْ

نْقَشْتْها كْلامْ يْمَجَّدْ بْهاكْ

وَعْلى طْريقْ جْدودْ صادْ

مَجْدوبْ فْ رَحْبَةْ ريحْتْهُمْ

ما يْدومْ إلَّا وْجَهْ  الدَّايَمْ

ما يْدومْ إلَّا وْجَهْ الدَّايَمْ

ب͠ق͠ل͠م͠ م͠ح͠م͠د͠ ح͠د͠ي͠ش͠

       م͠.ج͠.ح͠  

                                                       2021\01\22