كان عندي حلم
عاطف كبارة
كان عندي حلم
وخطوطه لسة بتترسم
كان عندي قلب
و ملامحه دايما تبتسم
وف بيتنا لقمة بتتقسم
كان عندي إخوات
وحشتني أمي وحضنها
ضحكة أبويا وعزها
ولعبتي وحبة حاجات
كان عندي حلم وبيت
وشجرة زرعتها
عند البيبان ...
وبنبض قلبي سقيت
لحد ما شوفتها
بتطرح ورود ...
وف كل ليل غنيت
بكلمة كتبتها
فوق الحيطان ...
لكن ف مرة صحيت
سمعت بلحنها
صوت البارود ..
كله إختفى من بعدها
وكله مات .......
باعيش ف خيمة
ف أرض صحرا
وليل سكوت ...
وسمايا غيمة
وجاية مطرة
وبرد موت ...
صوروا دمعة عيوني
وإكتبوا ...
وإتألموا لدقيقة وإبكوا
بدمعتين ...
شوفوا هدومنا مقطعة
وإتصعبوا ...
آخرتها إيه سطرين عزاء
من كلمتين ..
وسيبونا ينحت جسمنا
برد السنين ..
والجوع يقطع بطننا
ومتشردين ..
بقينا فين وكنا فين
لو تعرفوا
أنا بنت مين ...
أنا بنت ليبيا والسودان
بنت العراق ونهرها
ومجدها ...
خير اليمن وجبال لبنان
شجر الزتون بفلسطين
وبحرها ...
وحشتني سوريا وأرضها
وحشتني أمي وحضنها
ضحكة أبويا وعزها
لعبتي وحبة حاجات
كان عندي حلم
بيترسم ...
كان عندي قلب
بيبتسم ...
وأم وأب وإخوات
كله إختفى
وكله مات ........
عاطف كبارة
ليست هناك تعليقات:
إرسال تعليق