مجنون ومجنونة
_________
ياعم يابياع قول لنا مين اشترى
ولا لسه البيت براح
والجنينة لسه فيها زهر البنفسج
والورود لسه معلم فى شوكها الجراح
ولا خلاص كل شئ راح
حتى العيون الضيقة
البصة فيها ضاعت
ولا اتعلقت على حبل المشنقة
لسه الحروف تايهة منى
مع انى
كنت قاضى المحكمة
صبحت حاجب كل شئ
حتى الامانى المعتمة
ولافضلش من ايام ماكنا هناك
غير حبة خربشات ع الضهر
من كرباج العهر
معلمه
ياه يا انا
لسانى واخد القلوع فى سكتى
وخطوتى
على بعد المسافة بينى وبينها
واخدانى لطريق تانى بعيد عن سكتى
ومحنتى انى مصدق كل شئ فيها
مجنونة بيا
ومجنون انا بيها
يافساتين العمر الطويلة
الاكمام قصرت
والطول بقى فوق الركب
معرفشى ايه اللى حصل
الراكب نزل
ولا الماشى اتركب
عمرى خلاص ع البيبان
واقف مستنى
يمكن تكون اخر فتحة
ويمكن تكون البداية
من الموات اللى طافح
على الدكة
لا تقول يافا
ولاتقول عكا
كل الحكاية بقت حواديت
بايتة
وبنات شابت جوه مهدها
وعيون بتلسع فى الجسوم
بتشق كل انواع الهدوم
وبتلبس الجلد القديم
وتحسس على الوجع القديم
وتعمله مكنسة
وحلق الحمصة غاب جوه الودان اللى غابت فى البدن
وطرحت التينة عنباية
وسكنها البوم
وفضلت سارح جوايا
شبابيك البدن اتكسرت
والبرد عشش جوه العروق
وانا مستنى شمس النهار تعدى
ولا تيجى ويا الشروق
تاخدنى وياها
وتمر احلامى
كما ايامى
كما الرهوان
وتعلم من اول الحلق
وعلى طول اللسان بالمرار
ويبلغ عنى قلمى
ولما ييجوا العسكر
يبلغ فرار
كأنه ماكانشى منى
ولا سنه كان سنى
وحتى تجاريف نيلى
خدت شكلى
غيرت ملامح شرايينى
وبدلت تشكيل طينى
خلتنى اسوانى
مالح كما اوطانى
د.سيدعبدالغنى عبدالصمد
ليست هناك تعليقات:
إرسال تعليق