*** خدوش ع الوشوش ***
سنين العمر بتولي ...
والقطر لآخرته واصل
خدوش على وشه بتعلم ...
وبياض الشعر له فاصل
وعقل يرجع الذكرى
ويقول بكرا إيه حاصل
شايل م الهموم دى كتير
وبرضه مكمل المشاوير
عشت لغيرك بتتحمل
تدي الحب بكل ضمير
ما همك أنت واخد إيه
ولا بتدي الحنان كدا ليه
دا طبع يا صاحبي بيعلم
طبع الكريم واتربى عليه
مكتوب عليه يكون حمال
يشيل من الحمول دي جبال
لا عمره قال تعبت خلاص
ولا الهم جه عليا ومال
بس العمر له أحكام
نفسك يوم تعيش في سلام
وتعيش الحياة لو يوم
من غير تعب وملام
أصل خلاص العمر قليل
واللي شوفته يهد الحيل
ماشي تعافر في الدنيا دي
والكل سايبك تآسي الويل
لكن راضي وأنا مش قاضي
علشان أحكم علي الماضي
بأنه عذاب وشقى وحرمان
وعمري ضاع علي الفاضي
كفاية إني شوفت أحباب
بأوصلهم لحد الباب
وأشوف الفرحة مالية عيونهم
ولو هدفه تمنها عذاب
هعيش الباقي كدا من عمري
راضي بحالى وقضاء أمري
وأوجه وجهي للرحمن
مستني يوم أقابل ربي
ولو قابلتوا دموع وآهات
أبقوا اترحموا ع اللي مات
وقتها بس هتعرفوا قيمتي
وتتمنوا أرجع لساعات
ابقوا ادعوا لي بالغفران
ورحمة واسعة من العدنان
كان سند وضهر حقيقي
وحضن دافئ وحصن أمان
**************************
بقلم / مصطفى كرم
ليست هناك تعليقات:
إرسال تعليق