♥️♥️♥️♥️♥️ صنف تاني ♥️♥️♥️♥️♥️
صنف تاني من القلوب
صنف مش ممكن يتوب
معنى تاني من الطيابة والغرابة
واللي عاش مغرم صبابة بالأمل
وسط الحروب
وسط غابة من الديابة
عاش وراسم سكته . جوه الدروب
خبى حلمه . واللي هَمه
إن نور الشمس . يفضل
حتى لو جالها الغروب
يعني لما الفرح . يغزل بسمته
على كل توب
والقناعة عنده كنز
حتى لو حظه ونصيبه كان ..... يادوب
عاش ومهما الكل يكدب
أو يعاند في الحياة . يأمر ويطلب
أو ينافق يعلى مرة . ويبقى منصب
يعني مهما الكل يغرق
هو عايم . جوه مركب
يعني مهما شاف ذنوب
ولا حتى كتييير . عيوب
عدى قدامهم بضحكة
صوتها بيعلم شعوب
♥️♥️♥️♥️♥️♥️♥️♥️♥️♥️♥️♥️♥️♥️
شادوليات
شاذلي محمد عبدالرحمن حسين
ليست هناك تعليقات:
إرسال تعليق