🏡قرية نباليه
نباليه يابنت الإيه
يابلد الحبايب
عشت فيكى طفولتي
والقلب فيكي دايب
عشت فى بيت جدتي
وكانت أغلى الحبايب
ياما نزلت الترعة
وياما أكلت توت
وجريت ورا السواقي
والراجل أبو نبوت
ولعبت فيكي الأولى
ولعبة الهولاهب
وشفت الدكان منور
بلمبة الكلوب
دكان خالى صادق
راجل طيب وصادق
وكان دايما أمين
من الناس الطيبين
وشفت الفرن البلدى
وأكلت عيش بلدى
بريحة الوقيد
كنت فرحان وسعيد
وأكلت على الطبلية
وذكرت على لمبة جاز
وشربت من الزير ماية
وحضرت جدى الباز
قرية نباليه بسيطة
وناسها طيبين
كلهم عيلة واحدة
على الفرح مجتمعين
وأنا عشت فيكى طفولتي
ويوم ما رجعت بلدى
حنيت للحنين
والناس الطيبين
نباليه يابنت الإيه
يابلد الحبايب
عشت فيكي طفولتي
والقلب فيكي دايب
🌹✍منى العشرى
ليست هناك تعليقات:
إرسال تعليق