& و100مرة هأقولهالك & بقلم الشاعر : شعبان محمد بدر

 و100مرة هأقولهالك

ظلام ليلك ظلام حالك

وقلبي لسه مش كارهك

لكن كارهاني أحوالك 

تتوه الخطوة في دربك

طريق فجرِك ماهوش سالك

.....

سواد الحزن في قلبك

وغلب الدنيا بقا حالك

تموت الكلمة في خوفك

ويدبل ورد بستانك

و نار الظلم في جوفك

بتسرق حلم أزهارك

.....

شعاع الشمس فيك مطفي

ورافض ييجي لنهارك

خفافيشك بتبني قصور

وساكنة في كهف أحزانك

وساحبينك لليل مجهول 

وتوب من الذل فستانك

.....

وحيدة في زمن مجنون

وطوق الأسر ما زانك

ضحية والضمير مسطول 

وشارب نخب خذلانك

عليلة والدوا موصوف

لكن في يمين سجانك

.....

#شعبان_محمد_بدر