قصيدة / عامية
( برواز متكسر )
كلمات /أسامة أحمد رفعت
زي العادة
كل ما أشوفِك صُدفة قصادي
تفرح روحي
وأحس ف قلبي
دقة زيادة
أغمض عيني
وفجأة ألاقيني
رِجعت بيا كل سنيني
وقت ما كُنا حبايب لسه
أجمل إحساس دخل القلب
وأول لمسة
شايفني وشايفك لسه هناك
أه عايزاك
بأتمناك
ومهما يحاولوا يفرقوا بنا
أنا ح أستناك
وانا واقف بأحلف
إني بحبك
زيك وأكتر
وأوعد قلبِك
عمري ف يوم ما اتغير
ولا أتصور
ولا حتى أفكر
مَر زمان
مَر كتير
وكل دا كان
قبل ما نبقى انا وانتي
صورة ف برواز متكسر
ياما قالولي الحب الأول
مش بيطول
عُمره قُليل
صعب يكَمل
طبع الأيام مش جوادة
زي العادة
كنت مفكر
عُمر البُعد ما يقدر
يجي ف يوم ناحيتنا
كان الحب مالي عينينا
وكل حياتنا
كان فارش كل وروده
في سكتنا
كان كاتب إسمي وإسمِك
على جدران بيتكو وبيتنا
كنت بأحسه بيفرح
أول ما يشوف خطوتنا
مَر زمان
مَر كتير
وكل دا كان
قبل ما تخطف منا الأيام
ضحكتنا
زي العادة
كلمات / أسامة أحمد رفعت
ليست هناك تعليقات:
إرسال تعليق