وعدي كان حُر...
لما بعدت ما سألتش
و لا حتى في يوم حنيت
ف بعدي عنك ما فرقتش
بس بتقول أنا حبيت !
و الحيرة ف بعدك تسكني
الحيرة في بعدك سجن و بيت
بتوحشني و ف أحلامي توعدني
أقوم من الحلم أستفسر
ليه الشمس في غيابك بتتأخر؟
يطول الليل و أحزاني
على الواحدة بتتمختر
كأن الشمس مرهونة على بابك
و أفراحي ف غيابك بتتبخر
جالي في يوم الفجر
قال افردي جناحك
ذنبي فيكي الهجر
و القلب سجانك
الشمس شاربة المر
و مخاصمة بَحَارك
أنا وعدي كان حُر
مررني في غيابك
الضد كان الكل
و عيونك أماني و بر
الوعد كان مكتوب
موشوم عليه القهر
جوايا خنقة صوت
جوايا قايمة الحرب
كل يوم فيكي بموت
كل يوم يجلدني الصبر
يا أم العيون جارحة
و ضحكها إدمان
جوا الكلام موال
مين يفهمه غيرك ؟
و عنيكي تفسيره !
تهاني بركات ١٥ / ١٠ / ٢٠٢٢
ليست هناك تعليقات:
إرسال تعليق