نظرة عتاب....
اتنهدت
و كام دمعة
من عنيها اتكلمت
اتبسمت
سابت في قلبي
كام حاجة علمت
و اتسرسبت جوه نفسي
من غير ما أحس
و اتمددت جوه العروق
عملتلي هالة من الجنون
ما بقتش شايف غير عيون
و كل فكرى أصبح ظنون
ما كنتش أعرف
إن يومها صابني مس
اتوجعت
شق قلبي سهم مُر
و الأَمَر
حبي ليها سجين و حُر
بيحكي عنه القلم
مع كل كلمة و كل حرف
كل يوم عاملي غارة
بيشاور لي عل الأمارة
جوه قلبي لسه حاره
رافضة ترفع ليها راية
بس هي جوه عقلي
ماسكة دفة السفينة
و بين ضلوعي موجها عالي
و الربان مدي الإشارة
حبي ليها ما كانش غاية
حبي ليها كان فريضة
اتقبلنا يومها صدفة
شفت ضحكة طلة ف عنيها
و من ساعتها روحي فيها
بحبها ،،،
و غصب عني جرحتها
و ازاي هداوي جرحها
سؤال غُلبت أسأله
و الإجابة كانت بسمة
غرقانة بدمعها
نظرة عتاب
و يا ريتني مت قبلها....
تهاني بركات ٧ / ١١ / ٢٠٢٢
ليست هناك تعليقات:
إرسال تعليق