(( البُكا ع الميت ))
ياللي بتبكي على الميت
والكل عليك باصص مخدوع
قلبك بيرقص من الفرحة
ومحدش فاهم الموضوع
بتبكي ليه عاللي مات
وعينيك مليانة بالدموع
عمال تنوح كدا بالساعات
وقلبك كأنه حزين موجوع
زي مايكون فيلم وبتمثل
من لحظة مايموت وهو بيتغسل
وكأنك زعلان بصحيح وحزين
بتدعيله بالرحمة ولله تتوسل
حرام كفاية وإرحم روحك
ياما أتمنيت إنه يموت ويغور
وظلمته كتير لجل ترضي طموحك
ونسيت إن بكرة هيجي عليك الدور
مش هو دا إللي أكلت ميراثه
وأذيته ياما في شرفه وعرضه
ومراعيتش مشاعره وإحساسه
وأستوليت على ماله بقى وأرضه
وأستكترت الخير والنعمة عليه
وكنت تشوف العمى وماتشفهوش
ومضيعتش فرصة إنك تإذيه
وكأننا في غابة مليانة وحوش
ياما قولت كلام كدب عليه
وسبيته بالعيبة وهي مش فيه
كان نفسه في كلمة طيبة ترضيه
لكن أنت أبداً ما رحمتوش
دلوقت جاي تصرخ وتنوح
ياعم إرحمنا وهوينا وروح
من جواك بترقص وبتطوح
سيبك من شغل حلق حوش
ياللي بتظلم أخوك أو جارك
كفاياك ظلم وصحصح فوق
مابين الخلايق هيتقل مقدارك
وربك شاهد وعالم فوق
رد المظالم بقى لأصحابها
وأستغفر ربك وكفاية وتوب
ليك السما تفتح أبوابها
وأرضى بنصيبك بقى والمكتوب
لا المال بينفع ولا حتى الجاه
ولا شيء بيفضل إلا عملنا
ولا حد بياخد حاجة معاه
والصالحات هي إللي هتبقالنا
البُكا ع الميت
شعر/ وحيد محروس خليل
ليست هناك تعليقات:
إرسال تعليق