باسورد قلبي
قصيدة غنائية
بقلم ماجدة البهيدي
=============
صوتك ده لوحده بيحيني
وكفيل إنه ده ينسيني
العالم والدنيا وكل الناس
وجودك جمبي ده يكفيني
إيدك في إيدي ماتسيهاش
معاك بس الحياة بتتعاش
بحبك و الله أنا صدقني
وبعدك قلبي ما يقولهاش
يابو قلب خطفني ونساني
إسمي ومنطقتي وعنواتي
أنا عقلي خلاص مبقاش فيا
من يوم ما سلام منك جاني
يا أغلى عليا من روحي
ده قربك يشفيلي جروحي
تعال وقولي أي كلام
وقول للفرحة لا تروحي
يا أهلي ودنيتي وناسي
ده إسمك جوه أنفاسي
ومهما البعد بنا يطول
أنا ببقى معاك بإحساسي
فرشت لك أنا رمشي
علشان وحدك عليه تمشي
ده لجل عينيك يهون المر
ولو على الشوك أنا همشي
كتبت لك على الأيام
عليا الحب والله حرام
بعلو الصوت بقولهالك
ده حبك عندي أحلى غرام
كتبلك أغاني جنان
يعيش حبك كمان وكمان
وأسجل إسمي مع إسمك
كلام يقولوه لكل زمان
أنا أحمد ربي والله عليك
ده كل شيء لقيته أنا فيك
حنان و أمان مع الطيبة
وكله كوم وإلا عينيك
ده فيهم سحر معرفتوش
غير في هواك مجربتوش
يا عالم حد ينجدني
بتوه فيهم يا ستار حوش
مفيش غير إني راح أسلم
معاك في الحب بتعلم
و مهما عيوني يشاغلوني
رفعت الراية ما حسلم
ولا حد بعدك حسمحله
يدق بابي ولا أفتحله
متقولش ليه ولا تسألني
قلبك ده مني وأنا أرتحله
باسورد قلبي بين إيديك
وحدك حبيبي أنا بريدك
روح قول لقلبك يطمن
بعت مرسال في بريدك
22/10/2022 السبت
:
#ماجدة_البهيدى
:
ليست هناك تعليقات:
إرسال تعليق