خلينا أخوات
................
وتعدى حاجات ومعاها حاجات
ويكبر موضوعنا مابينّا
وف الاخر بتقولّلى
خلينا اخوات...
بأمارة ايه ...
بأمارة يوم مالمست ايديك
وحضنت الشوق من رمش عنيك
انا بالنسبالى مش هقدر
إن يكون احساسى لقلبك
زى الاخوات
مانت اللى كلامك
كان كله معانى
ومتغطى بإحساس الحب
وعقلك تايه فى كتير اوقات
واما أسأل مالك ..
تجاوبنى بتنهيده
ونظرة عينك تحضنى
بس بتعشق مِ العِند سُكات
ولما عرفت انى هواجهك
وهاقولك كل اللى فى قلبى
خُفت يِبان الشوق جواك
واعرف إن انا كنت فى احلام اليقظة معاك
حتى كتير من لياليك
كنت تاخُدنى فى حضنك ابات
والرد يادوب منك عالقد
تجاوبنى وبتهز فى راسك
وتقوللى ساعات..
وردك على قلبى
كلام زى اللى بيحكوه في الروايات
واسمع مِنك تقوليلى....
ايوه ساعات
ساعات زيك عاشقه وبجنون
وساعات خايفه
وساعات خايفه أن يكون حلمك اوهام
تصبح ماتلاقى غير قلبك بيقول دا حرام
اعشق ويكون فى نهاية كل طريق للحب
تلاقى استسلام مرفوع له رايات
من اول عتبه باب مقفول
او حتى كلام جارح هيقوله عزول
خايفه دموع العين تجرى
ويكون مجراها من الحزن سيول
اصل انا عارفه إن الحب نهايته
حاجه من اتنين
أولها فراق والتانيه ممات ...
وعشان كده انا دايما اقول
خلينى احبك
خلينى احبك
اكتر ما يكونوا اتنين اخوات
والمرة دى انا اللى هاقول بأمارة ايه ...
ما هو احسن حب ما بين اتنين
...........حب الاخوات .......
..........................
مصطفى محمود المرسى
مصر 🇪🇬
ليست هناك تعليقات:
إرسال تعليق