أمي عيد
*********
من زمان معرفش كان
قريب حبه أو بعيد
كنت أنا مولود جديد
البراح في حضنها
كان يساع الكون بحاله
وكل ما اكبر
يزيد وسعه وجماله
كبرت حبه
وحبه حبه
مشيت طريقي
كنت فاكر اني اقدر
استخبى
عن عيونها
كانت تشوفني بقلبها
في كل خطوة
ولما اميل تسندني
دعوة
يكفيك شر الطريق
وشر نفسك
والخلايق
ولو يوم اتضايق
أجري عليها
تضمني
فتغنيني عن الحبيبة
والصديق
تعملّي فرش وغطا
من الدُعا
يابن قلبي
يفك كربك ويزيل همك
ويسعد ع الدوام قلبك
ورقوة حلوة
بالكرسي والفلق والناس
وحصوة ملح ف كفها
تخزي بيها
شيطان وسواس
فترتاح راسي ف حجرها
والاقي ظلام الكون
يضيء
أمي يا جنة ربنا ع الأرض
عهد عليا اكون وديع
اكون مطيع
واقول للدنيا كلها
إن حُبي لأمي فرض
في كل يوم
أمي مش محتاجة عيد
يوم في السنة
دي أمي عيد
طول السنة
الشيماء زقزوق
ليست هناك تعليقات:
إرسال تعليق