كلمات/ صبرى عبد الواحد الحساني
معلم بمدرسة الإصلاح الزراعي بنجع حمادى
قصيدة تتحدث عن صاحب رخم ثقيل لا أحبه ولا اطيقه ولكنى مجبرعلى مصاحبته يجب أن اصاحبه واسمع كلامه واعمل ما يرضيه ولا اعانده لأن فى عناده هلاكى وفى صداقته ربما تكون نجانى بإذن الله
صاحب ثقيل
هاصاحبك غصب عنى
علشان ما تاذينيش
عداوتك فيها همى
وممكن ما اقدرش اعيش
هاصاحبك وليك أغنى
واتمنى تمشى ما تاجيش
واسمع كلامك وانفذ
أوامرك من غير تطنيش
واعمل كل اللى عايزه
ما عنادك ما ينفعنيش
هاصاحبك غصب عني
علشان ما تهدمنيش
وتحط فى يوم عليه
والمشى حتى ما امشيش
والنوم يروح منى
وفى الحلم حتى ما تسيبنيش
هاصاحبك وامشى كتير
علشان ما تلزقليش
ها صاحبك واكل بحساب
يمكن تمشى وما تاجيش
هاصاحبك والعب رياضه
واكل جبنه قريش
ها صاحبك ياصاحب ثقيل
لازم معاه اعيش
ها صاحبك واسمع كلامك
حتى لو ما يرضنيش
ها صاحبك واخد علاجى
ومن الحلو ما تحرمنيش
هاصاحبك غصب عني
ما عنادك مايفيدنيش
هاصاحبك غصب عني
يمكن تمشى ما تاجيش
هاصاحبك واكل زبادى
وعلى المحشى كتير ما اجريش
اطرافى نملتهالى
وصداع ما بيسبنيش
هاصاحبك علشان اكسبك
وفى صحتى ما تاذينيش
خلاص ما عادتش تفرق
تمشى أو ما تمشيش
هاصاحبك علشان مصلحتى
بصراحه ما هاخبيش
لكن والله ما طايقك
واتمنى تروح ما تاجيش
صاحب رذل
ها صاحبك علشان اعيش
واقدر اكمل حياتى
من غير إرهاق وتعب
ولا اتعب ولادى ومراتى
واحافظ على نفسى منك
واحترمك طول حياتى
خايف. ايوه انا خايف
ما يغرقش سكاتى
علشان كده هاصاحبك
وعلاج هاخد ليلاتى
ولا اقصر يوم واهمل
ورياضه هالعب يوماتى
صاحب ثقيل
يا صاحب رخم وثقيل
وملخبطلى كل حالى عن
الصحه فى عنادك تضيع
وما ينفعنيش مالى
وانا لسه فى عز شبابى
ونفسى اريح عيالى
وأشوف احفاد ليه
الله يرحمك يا خالى
قلتلى ده عدوك ولكن صاحبه
ترتاح طول الليالى
هاصاحبك
سموك قال أنت سكر
والمر كله فيك
قاسى وقلبك حجر
وما فى علاج بخفيك
ما ترحمش وتقعد تكسر
فى عظام من يعاديك
زى الزمان ما بترحم
وصعب حد يرضيك
علشان كده هاصاحبك
يمكن اضحك عليك
وحياتى وياك اكمل
يمكن ربنا يخفيك
هاحرم نفسى من حاجات
علشان اكسبك وارضيك
الى كل مريض سكر العدو اللدود القاتل الصامت
صاحب عدوك التزم بعلاجك العب رياضه تمشى على الأقل نصف ساعة يومياً كل اى شىء لكن بحساب
شفانا الله وشفاكم أمين أمين أمين يارب العالمين
اخوكم/ صبرى عبد الواحد الحساني
معلم بمدرسة الإصلاح الزراعي بنجع حمادى
ليست هناك تعليقات:
إرسال تعليق