♕ كان واحد مننا ♕ بقلم الشاعر : منصور أبو قورة

 كان واحد مننا .. !!

ف عزبة جدي 

الليل كان عاشق ..

فصل الصيف

والصيف عندنا ..

كان أحلى كيف 

يمشي الليل 

فرحان .. غرقان 

ف بحر الروقان 

ومش دريان 

شايل ع كتافه

قربة مليانة ..

ورد .. وريحان 

وعصير رمان 

عمال بينادي علينا ..

ياللا يا جدعان

ويخش علينا الدور

ف ايديه طبق بللور 

مليان حنين وحنان 

وحاجات تانية كتيرة

يفرح بيها قلوب ..

صبيان .. وبنات 

زي الشربات 

أشكال والوان 

وفى ايده التانية

نايات

يعزف بيها ..

حكايات 

أجمل ألحان 

ويفضل سهران 

يحني قلوبنا حنين

ويطبطب بشويش

ع قلوب المساكين 

وكل يتيم عدمان

الليل ف عزبة جدي ..

زمااااااان 

كان عنده تقوى 

وإيمان 

كل يوم يرقينا ..

كام رقوة

تحرق عين الشيطان 

وتحصن كل الجدران

لا نشوف .. خوف 

ولا وش كسوف 

ولا قلب حزين 

يبات .. ملهوف 

ليوم الدين 

ولا جنية تخش علينا ..

عتبة دار 

من أي مكان

الليل كان .. 

واحد .. مننا

زي ابونا وامنا 

وخالنا .. وعمنا 

وكان يجي لابس ..

" جبة .. وقفطان "

كان كاتم أسرارنا

وصاين كل ديارنا 

وحارس لنا الأجران 

كان قلبه مخاوي 

لكل الناس 

ف عزبة جدي

برقة وإحساس 

عمر ماكان قلبه

حجر صوان 

كان قبل الفجر ..

يطوف ...

ع كل الدور 

يفرد جناحه علينا 

ويغطينا بستر أمان

الشاعر / منصور أبوقورة