أصحي يا أمة
**********
اصحي ياامة شوفي مين واقف على الباب
بياخد ولادك واحد ورا التاني للهلاك والعذاب
هتصحي امتى بس وتصرخي في وشهم وتقولي لا للخراب
اصحي ياامة وفوقي بكفياكي والنبي نوم
أنا الدق شغال على راسي كأني في هون فص توم
كأني بربري مش البلادي كاني أنا بن الشوم
ويوم ما يقربوا مني بس عشان يتلايموا على المعلوم
مصوا دمي وهرسوا عضمي وشيلوني هموم على هموم
غرقوني في بحر ديون طيرت من عيني النوم
هتصحي امتى بس وتصرخي في وشهم وتقولي دا مظلوم
اصحي ياامة دا مش وقت الدلع ولا وقت الهزار
ابنك مابقاش عارف من كتر التعب ليل من نهار
هداه الطاحونة إللي داير فيها وقتلاة حيرته والأفكار
عايش في بلده لا محصل فيها بني آدم ولا حتى صرصار
ملوش عند المسؤولين أي قيمة ولا أي اعتبار
كأننا جربه ياامة مش من حقنا نعيش الإستقرار
ولا من حقنا نصرخ ونقول الحقونا من الغدار
هتصحي امتى وتصرخي في وشهم وتقولي دا مش حمار
اصحي ياامة والنبي بالله عليكي أنا فاض بيٰ الكيل
أنا لا عنصري ولا عسكري ولا حزبجي ولا ليٰ ديل
ولا مطبلاتي ولا مشهراتي ولا سكورجي ببيع الويل
ولا إعلامي ولا هُلامي ولا ترزجي بفصل القوانين
أنا مواطن جوايا ساكن حب وطن مش عايزه هزيل
هتصحي امتى وتصرخي في وشهم وتقولي ابني مش ذليل
اصحي ياامة واصرخي قبل فوات الآوان
قبل ما يخلصوا علينا وعلى كل واحد جواه إنسان
دول عايزنها عزبة ياامة وأحنا فيها الخرفان
يضحوا بينا في أي ساعة وأي ساحة بلا اتمان
وبسم الوطن اللي خانوه يبيعوا فينا في سوق الجدعان
واللي يبيع ويشتري فينا للأسف أجبن جبان
وبسم الدين اللي باعوه يرمونا في آتون من النيران
هم يعيشوا على قبورنا يبنوا القصور والهيلمان
هتصحي امتى وتصرخي في وشهم وتقولي دا كان زمان
اصحي ياامة وارحمي فيكي الكبار قبل الصغار
اللي اترموا عشانك جوه السجون والأسوار
اصحي ياامة اتكلمي فكي حصار الكلام
قولي للدنيا بحالها دمي ولادي كله حرام
خلينا نشوف يوم الحساب في الظالمين
دوقينا طعم العدل اللي اتحرمنا منه سنين
اصحي ياامة وحسسينا إن العمر مش راح بلاش
وإن ايمانا إللي مالينا إن عمرك ما تبقي للأوياش
اصحي ياامة وقوليلهم مين اللي مات ومين اللي عاش
اللي مات حر والحر عاش والندل مهما عاش مش عاش
اصحي ياامة وعرفيهم إن الحريه مش بيلاش
اصحي ياامة
الشاعر السيد حسن......
ليست هناك تعليقات:
إرسال تعليق