♕ صدق المشاعر ♕ بقلم الشاعر : حسن الشوان

 ......... صدق المشاعر .........

 عمر ما كانت المشاعر بالمقاوله

ولا تتباع ولا تتعبا فى شوال 

ولا ورق كوتشينه ولا طاوله

ولا أى حروف تتكتب وتتقال

ولا أى ملامح فى أى مقابله

ولا حكايات من القيل والقال

ولا قصص مؤلفه من الخيال 

ولا كلمات ملدومه فى جمله

ونظرات فى الطالعه والنازله

ولا كام كلمه حلوه فى موال

ولا ليها تقسيمه ولا رنة طبله

ولا ناى حزين حرك الجبال

المشاعر حبل علاقة متبادلة

طرفين ممدودين ذى الحبال

فى كل مكان ليهم نبع وقبله

وتواصل ممدود وفيض شلال

إرتياح ربانى جوه القلوب وصله

وتواصل المشاعر لا يقدر بمال

عمر ما كانت المشاعر بالمقاوله

ولا كانت تخطر على أى بال

صدق المشاعر ف تبادل المعاملة

وتوافق القلووب يشق المحال

.............................................

.......... .. حسن الشوان 🇪🇬 ........