# بص لنفسك
بُص لنفسك ياريت ف مرايتك
حتلقانى ببُص عليك
بُص اتأمل نُصي الأول
نُصه التانى مرسوم ف عينيك
بُص لنفسك واسأل نفسك
ليه أنا وانت جسد وروحين
دا كل شئ مشترك فيما بينا
حتى الهمس مابين عاشقين
أولع شمعه ، تعشق ضوئها
أرش عبير ، تدوب ف حنين
حتى شعاع الشمس الساطع
حلم ودايب بين قلبين
تغزل منه توب الفرحه
أغزل منه كحل العين
إنشر شعرك دفي أنفاسي
ماهو إحساسك ده إحساسي
وانا أطبعلك ع الخد الوردي
قُبله تِدَوبْ أي مآسي
إرمي آهاتك حمل لضهري
حتكون مهرك ..
حتكون تاج بيزين راسي
بُص لنفسك ..
بقى مش نِفسَك
ترمى أحضانك بين دراعاتي
تُعصر شوق ياخدنا لفوق
وتصبح حِلم بين نبضاتي
بُص لنفسك ياريت ف مرايتك
حتلقانى ببُص عليك
دور تلقى نُصي اﻷول
نُصه التانى مرسوم ف عينيك
عبدالحميد المرسى
ليست هناك تعليقات:
إرسال تعليق