♕ في صورتك حكايتي أنا ♕ بقلم الشاعر : أيمن بلال

 ... في صورتك حكايتي أنا.... 

حبيبتك أنا من كام سنة

لا يوم حسيت بيا

ولا لمحت نظرة عينيا

مع إني عشت بيك

ورسمت الحب فيك

وسهرت الليل معاك

أحكي شوقي لهواك

وكان بيننا حاجات

وكان بيننا حكايات

وضحكة قلب وسكات

ونظرة تقولك أنا هنا

حبيبتك أنا من كام سنة

حبة صور بأسهر معاها

ويا القمر بيبان ضياها 

ونعيش سوا ليل العاشقين

وأقرب بيها ليك بطلة عين

وأعاتبك وأحاسبك بكلمتين

وأصالحك ببوسة وللا إتنين

وأحكيلها وتحكيلي 

وتمسح دمعة من عيني

وتقوللي خلاص سامحيني

مين حبيبك غيري أنا

وأسامحك وأقرب منك

وبلمسة إيد أقول بحبك

ولا يوم غيبت عني

ولا يوم راحة أفارقك

عد السنين هتلاقيني فيها

واخدة صورتك وعايشة بيها

ف قلب حضني أطبطب عليها

وأصحى أصبح بنظره ليها

حبيبي إصحي صحيت شمسنا

يالا نعيش يوم من عمرنا

بلاش تضيع دقيقة مننا

خلي الحياه تصبح علينا

هي إيه الحياه غير صورتك

بيها عايشة حكاية حبك

بيها بأحلم بيوم فيه أقابلك

وأحقق حلم حقيقته من حقنا 

هي دي رسالة حبي ليك

صدقها أنا مش بأكدب عليك

عشتها سنين خايفة أقولها ليك

عرفت حبيبي إن حبيبتك هي أنا

..... أيمن بلال...