الیوم عید
جیت متعنّي ابعهودك ، و أنا الك بالانتظار
فرّحتني اتمر علیّه ، او واعدّت گلبي ابقرار
***
اتاخّرت گلي اشجرالك ، عیني فدوة و اشلفاك
ابعیني عنواني کتبته ، تهیّت دربك شجاك
***
مو خلص صبري تگلّي ، اتعذّب ابگلبي اشترید
ارید اشوفك هاي فرصة،او بکری یمکن عدنه عید
***
النّاس فرحانه او تعاید، و أنا محزن من هواك
بس اشوفنّك ابگلبي ، بالحلم طاف او اجّاك
***
ادري مسجون ابدلالك ، ادري مهموم او غریب
گلبي مجروح ابحنانك ، او جرحي ما ظنتي یطیب
***
ما یود گلبي یعاید ، اول ازیارة الحبیب
عاهدتني اتکون یمّي ، والعهد قسمة او نصيب
***
آه یربّي ابگلبي حسرة ، اتدمّرت و الحب عذاب
ریت اشوفه ابلحظة وحدة ، و اندفن تحت التراب
***
جیت ادگ بابك و اعاید ، فکري بإحساباته لاذ
اخشی من اهلك حبیبي ، یسألونك من هو هذا
***
اتگول ما اعرفه او بلاني ، اتگوّم الوادم علیّه
تنکر الحب او هوانه ، او تکتب ابگصتي المنیّة
***
لو تزیل الخوف والهم ، او تطلع اتعاید سعید
علی اعناد العاندونه ، انعید او نلبس جدید
***
خل اشبگنّك و ابوسك ، خل یشوف الما یشوف
اببابکم و اکتب وصیّتي ، گلبي حبّك ما یعوف
***
من تصد عیني اعلی عینك ، ما اهوّد مستحیل
تدوي نار ابّطن گلبي ، اتحب تطفیها او تشیل
***
مو صحیحة الخان عهده ، تنسه و اتفارگ حبیب
اتوادع الیشفي ابجروحك ، او تنتسب قدرك طبیب
***
الشاعر الشعبي : جاسم ثعلبي الحسّاني 13/03/1397
ليست هناك تعليقات:
إرسال تعليق