♕ بْدَرْ الزِّينْ ♕ بقلم الشاعر : ذ. محمد حديش

 زجل ملحون

~~~~~~ 

بْدَرْ الزِّينْ

~~~~~ 

عِيني شافَتْ بْدَرْ الزِّينْ تايْلالي

سْحَرْني تْبَسَّمْ ؤُزادْ الْڭَدَّامْ 

ڭُلْتْليهْ لله غيرْ كْليمَة ؤُسْغالي

حْدَرْ عِنيهْ ؤُسْكَنِّي الغْرامْ 

خادْ ڭَلْبي ؤُتْلَفْ مْعاهْ مَرْسالي

تْعَشَّقْ غْرامي وْتْرَبَّعْ عْوامْ 

لله خودُوني عَنْدْ مَحْبوبْ هْبالي

رَاني مَحْروڭْ عْطَفْتو قْوامْ               

جْمَرْ عَشْقو مَحَّنْ نارْ تَسْوالي

صُورْتو مْعايا جْفاتْ الكْلامْ 

لله يا عُشَّاقْ جاوْبو تَسْوالي 

كيفْ نْداوي كِيَّتْ الهْيامْ 

زينْ الْفَلْجا الْمَسْرارْ المْبَسَّمْ غْزالي

سُبحانْ البْديعْ المْصَوَّرْ التْمامْ

قَصْتي مْعاهْ مَزِّينْها مْعاوْدا تَحْلالي

حَيْلاتْ العْقَلْ ساهي تَخْمامْ             

مْطَيْرا نْعاسي هاكْدا ديما حالي.

سَهْرانْ مْعَ صورْتو ڭَمْڭَامْ 

إِمْكَنْ يْبانْ هْلالو إِضَوِّي مَرْسالي

الزِّين مْحَبُّتو مْعَطْرَة الرْسامْ 

نْعَضْ فْ الصْبَرْ نِيْتي ڭْوَّالي

وَنْزَيَّرْ صْريمَتْ لَبْغو تَزْمامْ 

دابا تَزْها الْأيَّامْ يْفَرَّجْها الْعالي

إِتَجْمَعْ شَمْلي مْعاهْ مَكْرَامْ            

ؤُكُلْ مْحَبَّة صافْيَة شَلَّالْها عالي

الْيومْ قَصَّتْنا عَرْسانْ بْالدْوامْ  

كْتَبْتْها فْ مْواجْ بْحَرْ حْلالي

مْعَطَّرْها زْهَرْ زينْ الْكْلامْ

بقلم✍️ذ.محمد حديش

~~~~~~~~~~~~

2019\10\12