..... ف قلبك وطني ....
بين التوهة والتوهة بتاخديني
ترجعي بحضنك ضيا سنيني
وأرجع ومعايا أمل ما تعاتبي
ألقاكي بتسمحي دموع عيني
وأرجع من تاني أعيش جنبك
أسقي أمل بكرة من شهدك
وأروي ليالي عشقي من حبك
ساعة ما ألقاكي قصاد عيني
ياسنين الهوي والحلم والبسمة
ياضحكة زماني وأيامي واللمة
ياحكاية عمري لما ينده علي البسمة
ياسر شوقي وأحلامي وحنيني
تعالي إيدي ف إيدك ننده علي بكرة
نقطف طرحه عقد بألف ضحكة
ونخلي إللي كان م الألم ذكري
لا تيجي علي بالك ولا تجيني
أنا جايلك مش طالب منك سماح
ولا جايلك أتداوي بحبك وأرتاح
أنا جايلك لأنك دنيا فيها براح
يساعي كل جراحي ويداويني
يمكن أكون أناني ف حبك
بس مهما بعدت تاني بأرجعلك
أنا طير عشه بس علي أرضك
مهما خدتني الدنيا حبك يناديني
أنا طفل مجنون بس بيحبك
مهما راح لغيرك تاني بيرجعلك
بدمعة أسف بيترمي ف حضنك
وألقاكي بحنان قلبك تضميني
إنتي وطن حبي وشوقي وحنيني
حلم لما تتوه أحلامي يجيني
إنتي الطيبة أتمرد ترجعي تسمحيني
ونور فجر من ليل اليأس ينجيني
.... أيمن بلال .....
ليست هناك تعليقات:
إرسال تعليق