سما الأمل (بالعامية المصرية)
بقلم الأديبة والشاعرة والكاتبة الصحفية
حنان فاروق العجمي
عايزة أعرف
هي ازاي الناس بتعيش
يجيلهم قلب يناموا وفي ناس تانية بتبكي
ناس شايلة الهم عنيها بتحكي
وقلوب الحزن ساكنها
وغربان الضلمة بتحضنها
مش قادرين يقولوا الآه
وأرواح هادية المولى حامداه
رغم ان ليلها طويل
لا نجمة فيه ولا عاد للنور جواه سبيل
وسواقي العذاب بتغني المواويل
يا نهر حَن إنُّه يفيض
لكنُّه لضفافُه أسير
ما بين جنبين لا يُمكن يعلا ولا يميل
والغُربة ماشية ف سِكِّتها
طريق واحد لا بيلِف ولا يدور
لا في استراحة ولا راحة
ولا خضار طارح فِ واحة
وعيون ف كل مطرح دبَّاحة
تجرح جلود دايبة نوَّاحة
نواح يصرخ ف جحور
لا مسموع له صوت ولا شايف نور
متغطِّي بتراب منَدِّي بريحِة الموت
والكل سِكنُه الخرس والسكوت
ظلمة والحق مقهور
ومفيش غير صوت حشرجة الزور
ويونس ينادي ف بطن الحوت
يسَبِّح يسبَح ف الملكوت
نَجِّيني يارب العرش مذعور
ويتخَبَّط صدى الخوف ف الصخور
تَتْفتِّت غرقانة ف بحور الشرور
يعلا الرَّدم ويشهق الجبل
يخبط سقف سما الأمل
تغرَّد كل الطيور
بكل قوتها تفرد جناحتها
تكتِب ع السحاب سلام ما يذِل
يترَد حقِّنا كامل
مش هنقبَل يوم إنُّه يقِل
وعزِّة نَفْس الآهات
ترسم ع الوشوش البسمات
وعزم الخُطى م النيل للفرات
يبني شموخ يمسح عبرات
يفرش دروب النصر
ويحلِف ليصلي بأرضها فجر وعصر
ولو ضاعت سنين العُمر
هنلملم دقايق وساعات أيام الصبر
ونرَجَّع دق الثواني المحبوسة
وأصوات تكبير مآذن مبحوحة
وأجراس كنايس ملفوفة ف شال
وترِن الحرية شعار
وتقوم اللحود تاخد بالتار
ونشيد يفتح باب زنزانة
وطفل غناه ف صدر أبوه
هنموت ونعيش أبطال
احنا الشمس شروق الكون
وملايكة تطوف وِسط سكون
إحنا اللي هنبني إحنا العون
بإدينا هنرجم كل ملعون
ليست هناك تعليقات:
إرسال تعليق