★★★ رموش شمعة ★★★
بحبك يا دنيتي وناسي
وحبك مكتوب ومش ناسي
يا أول حرف علمني
وآخره واخدني من ناسي
بحبك شمعة مضوية ف قلب الليل
تنور ليا لياليا برمش كحيل
و تمسح م الجفون دمعه
فشوف طيفها حلم جميل
شعاعك فيه دفا وحنان
يدفيني يخليني كما الولهان
ولو لحظة سرقني الخوف
تكوني ليا شط أمان
عليه برسى وفيه بنسى
ألم روحي
في ليل جافي ومش
صافي يزيد بوحي
فألاقي موجك الهادي
بيشفي لي أنا جروحي
بحب الغيرة ف عيونك
وغضبك مني و جنونك
بشوف و ياهم الفرحة
وحبي اللي .... ملا غصونك
ومهما قالوا فيك الناس
بأنك صخر مش حساس
هقول معلش مش فاهمين
إنك قمر بقلب الماس
يا أغلى عندي من روحي
و دايبة فيك أنا روحي
بتفهمني بنظرة عين
ومن غيرك تضيع روحي
بحبك وانت نسمة صيف
هواها عبير وروحه لطيف
يعدى فوق خدود الآه
فيرسم فوقها ضحكاية ودم خفيف
هقول تاني وأعيد تاني
يا أجمل شمس وخداني
بحبك حب ما له حدود
و شروقك عمري و زماني
★★★★★★★★★★★★
بقلم / مصطفى كرم
ليست هناك تعليقات:
إرسال تعليق