"الخريطة"
بدور فيك عن نفسي
وكان نفسي ألاقي ليه مكان
أتارى القلب متشبع
وكنت الدم والشريان
وأصْلي جوايا متربع
وأنا اللى زارع فيك حنان
وكل العين م بتدمع
بكحلها بترابك وأنا الكسبان
أنا الفلاح أنا النورج
أنا الساقية وقلة العطشان
راوى أرضك بعرقى
ودا زِينة الشقيان
وأصل مراتى فرعونى
وجذورها منبتة فى أسوان
وكان مهرها وشبكتها
أقف ع الحدود ديدبان
وإبني يرضع شجاعة
لأجل ف يوم ما يتهان
ويصون أرضك وعرضك
ويرسم لك خريطة من المغرب لعُمان
وبنتى العفيفة بخمارها
حافظة السنة والقرٱن
واخواتنا عزة وشرف
أهل وخلان وجيران
وروحنا متعلقة بالقدس والحرمين وعَمان
وان جارت يوم الأعادي
تلاقينا سيول وطوفان
عمر الملايكة ما خافت
ف يوم يا ناس م الجان
نشرب بن اليمن
ونحلى بتفاح لبنان
وشريانى سر الحياه
وبيسقي كمان السودان
نشتى ف المحروسة
ونصيف فى بلاج وهران
أنا العربي وعايش بكرامتي
وبلاد العُرب كلها أوطان
كلماتى:
الشاعر: حليم محمود أبوالعيلة
مصر
ليست هناك تعليقات:
إرسال تعليق