اﻷرض الطيبه
شعر /سعيد حمدي محمد
*************
أرضي الطيبه يا حافظه مجهودي
ياستري وعرضي وأصل لوجودي
يا شاربه عرقي ودمى بالحنين جودي
العمر فيكي قضيته مرار قاسي
عرق جبيني نازل على فاسي
بدرتك همه وحماس ونهجت أنفاسي
خايف يخيب العشم وتدبلي عودي
★★★★★★
محراتي سرح ضفايرك فى الضحى البدري
والفاس خطط جبينك والميه راح تجري
والساقيه تعزف نغم ويزقزق القمري
ع التوته واقف يغني مواله فرحان
لما روينا الشراقي اللي كان عطشان
وادي الندى يسري في قلب العيدان
واطمن البال وايماني ملا صدري
★★★★★★
شب النبات فارس في طوله وعرضه
يلعب ويا النسيم لما خضر أرضه
هزم الآفات ودايما للوحش طرده
يتباهى بسواعد عفيه سهرانه ترعاه
شايفه السعاده وكل الهنا وياه
وإيمانهم بربهم هو السند والجاه
وحمدو الإله فى كل صلوات فرضه
★★★★★★
شعر "سعيد حمدى محمد
12/1/2023
ليست هناك تعليقات:
إرسال تعليق