((( توابيت العشق )))
آخر شهيد ف العشق أنا
خلع القلوب م الصدر
غية وحرفنة
سفاح بسيف
يدبح رقاب المغرمين
يعصر قلوب العاشقين
سجان بيحكم ع البريء
والقاضي يقفل محكمة
كل الحمام مدبوح قتيل
والصقر يحرق مظلمة
لعنة شيطان
أنيابه شر
والطعن غدر
الفين تابوت متجمعين
ياخدوا العزا
وحطام ندم
غرقانة دم
والطعم سم
ورمادها غم
مرسومة سكة ع الجبين
محفور و وشم
والحب كلمة محرمة
والعشق جوة المفرمة
دستور قانون
إبليس وفارض سطوته
سياف مخيف
حليف وجع
سجيل حجر
على كل راس
تلمح أميرة ملثمة
مصير عسير
كل الرعايا المقهورين
قرابين وموت
والحزن مل
والراية سودا ومبهمة
وراية حمرا للحرس
والفتنة سايقة ومعلنة
والعشق عار والخير مرار
والفجر عم السلطنة
سكين بيجرح ف الخدود
ومستحيل أحلام تعود
الفين تابوت ياخدوا العزا
ومفيش جنازة أو كفن
قلبي البريء مات وإندفن
والف رحمة ع الغرام
لما السكات سمع الكلام
جيوش بترعى ف لحمنا
سوق النخاسة مستباح
فيه النكاح والزوجة زي الأرملة
وعبلة طالبة الإنتحار
والإختيار والأصل بكر
والإنتظار تاه منها
حلم البنات السكرة
يومها الطوفان داس عنترة
والشعر اصبح مقبرة
تحضن حروف تحت التراب
والوحي غاب والفكر تاب
حتى الجنين قطع الرحم
رفض الحياة
رفض الخطر
رافض يكون صنم أصم
بين البشر
والصبر عاند الزمن
والخيط رفيع
بين أمل وبين ألم
ومصيره قطع
مفيش مكان للمحتمل
الفين تابوت ياخدوا العزا
واللعنة لسة مركزة
والعشق ممنوع الإتصال
بين المشاعر والدفا
الفين تابوت ياخدوا العزا
واللعنة لسة مركزة
بقلم //
عماد سيد
ليست هناك تعليقات:
إرسال تعليق