صندوق الذكريات
شعر / عادل رشوان أبوعيطة
..............................
صندوق الذكريات
مهما هربت منه
مهما بعدت عنه
وكنت عكس الاتجاه
لو غمضت عينيه
وشايفنى و شايفه
رغم الضباب
وظلمة الأيام
وفزعة القلوب
وتوهان العقول
وكسرة النفوس
وقسوة المكان
و برودة المشاعر
في مكان بعيد
فى زاوية مزوية
من ركن حياتي
بصوت مخيف
يهز أركانى
يزيد ألامى
يدوس أوجاعى
ينادى بجبروت
افتح...
فك الصدا
عن متاريس ببانى
شوف ذكرياتك
راجع أيامك
خايف مرعوب
تعرف ال عادوك
والناس ال باعوك
وال رتبوا وال تأمروا
وحاولوا يغتالوك
أمل و حلم وروح
وفى مراية ذكرياتى
تشوف ال ظلموك
تعدي على نهر دموعك
ال سالت من نن عيونك
فى ظلمة نهارك
قبل سواد ليلك
افتح و واجه
بصدرك و قابل
كفايه هروب
انا وبس
صندوق ذكرياتك
رمز خوفك وألمك
رمز حلمك وأملك
كفاية هروب
افتح للشمس تنور
كل المكتوب على جدارى
من ذكريات فات عليها زمان
خلى ضى شعاعها
يطل من بابى
يدب العافية فى أركانى
يزيل الظلمة من صباحى
يهرب منه الظلم للظالم
ويدوق وجع ظلماته
افتح صندوق ذكرياتك
وسيبك من عدو أكل قلبه
من كتر حقده عليك وغله
وبص لحبايبك
صورهم علقوها على الجدارن
ذكرى تعيش بها سعيد
لم ترجع و تعود
وتفتح صندوق الذكريات
بضحكة حلوة
مرسومة على الوشوش
حبايبك كتير
عيونهم سعيدة لأنك فيها
مالى عليهم حب الأيام
افتح ببان الذكريات
للبدر ينور لياليك
وتشوف نجوم حياتك
رسمه على جدران ذكرياتك
حكاية الطيب
أبو قلب كبير وحنين
ليست هناك تعليقات:
إرسال تعليق